من نجد لين ديارك المحميه اخط حرفي يبلغك وش بيه

من نجد لين ديارك المحميه ..
أخط حرفي يبلغك وش فيّه ..
من نجد لين حدود موطى رجلك ..
ولهامتك يادنيتي المعنيّه ..
سلام والمعنى على ماودّك ..
هذيك لعيونك تشابه ذيّه ..
قلت ان تعبتي والبلا تعبتك ..
لكن نذر بدر على أطيب نيّه ..
يادنيتي لاقلت لك تعالي ..
تكفين لاتقولين أنا مافيّه ..
لأنك إذا جيتي تجيني روحي ..
شوفك جمع لي اطرافي المرميّه ..
أونّ ونّة شوق لاجيتيني ..
وان غبتي الونّات تبدّ الميّه ..
شوي وآكل كفك من اللهفه ..
كل الخلايا في حضورك حيّة ..
أغمّض عيوني وأطفي الشمعة ..
والنور خافت والعطر في يديّه ..
أحلى ترانيم الموسيقى أنفاسك ..
حرارته في ليلةٍ شتويّه ..
أمد يدي وتتراعد يدي ..
كني بأرض من السموم حميّه ..
ساعة وذقت من الشهد ما أرواني ..
واللي لها أصبح من بعدها ليّه ..
من بعدها كني سكنت بروحك ..
وانتي بعد لازم تكوني فيّه ..
ايه اسكنيني واقطنيني كلي ..
لأجلك أصير الكوره الأرضيه ..
كلي ديارك وزعي بجنودك ..
شوفي بلا نظارةٍ طبيّة ..
أقربك لين أكبر بوسط عيونك ..
هاك اشربيني بمويةٍ مقريّة ..
أبي أصير بكل عرق بجسمك ..
وأهددك بالنوبه القلبيه ..
وأنا بحطك وسط حرف أشعاري ..
وألحنك باللهجه الروحيه ..
واذا ضميتي اشربي من كفي ..
أصبح قراح الشفه الورديه ..
نبقى كذيّا لين يظهر فجرك ..
ومن بعدها هاك الذي في يديّه ..
وتعطري به وعطري به جسمك ..
روحي وهاك القبعه الشمسيه ..
والشمس لاغابت وغاب العالم ..
أنا تراني أنتظرك هنيّا ..
انا تراني انتظرك هنيا ..