الغربة

ألا يالله اني طالبن طاعتك ورضاك ..
وعلم ليا ذكروا هل الخير نذكربه ..
أنا في رجا عطفك وانا ملتجي لحماك ..
تفرج هموم القلب يافارج الكربه ..
ليا ذعذع الغربي وحرك غصون الراك ..
وناح الحمام وعالي الصوت يجهربه ..
تنهدت مثل المضرم اللي لقى التنباك ..
تنهد صويب مونس لكزة الحربه ..
أجاوب حمام الورق يالايمي عساك ..
يحدك زمانك يم من لا تبي قربه ..
ذليل ليا جيته خجول تعد خطاك ..
تلزا وقلبك واهج النار يسعربه ..
ألا ياحمام الورق هيضتني بغناك ..
مع الهم والغربال والبعد والغربه ..
ألا ياحمام الورق ماشفت ولا جاك ..
ترى ينفع المهموم علم يبشربه ..
عن الدار واهل الدار والسر مايخفاك ..
غريب تحداه الزمان وقلع سربه ..
من أول يجوز العذر للي يروح هناك ..
وانا اليوم مالي عذر ويش اتعذر به ..
مسكها حكيم الراي وان دارت الأفلاك ..
وقاد السفينه واشرق النور مع دربه ..